Hacìmu cuamu hice Sant'Aliassiu,
pigghjiau mugghjiari e non 'nci cumbenia.

All'uattu juarni chi ssi maritau,
la spasa e li bicchera ammianzu jianu.

Maria si vota tantu spaventosa:
oh Aliassiu, Aliassiu chi cuasi su chissi?

Ccittu Maria e chjù non spaventare,
ca chissu è nu santu vutu c'avia a fare.

Io hice vutu mu giru sett'anni,
sett'anni a sette a sette miserere.

Mentre su santu vutu avivi a ffare,
pecchì pigghjiasti a mmia pè cara sposa?

Maria 'nci dau l'aniaju e lu specchjiale:
ricordati di mia quandu ti 'nda viani.

Maria si mise 'mpinestra di lu mare
mu vide quandu vene lu pallagriniaju.

Pallagriniaju mio chi di mare vìani,
vidistuvu a Lucriazia, a lu romanu?
Io arzira mangiai e 'mbippa cud'Aliassiu.

Mentre sa Santa nova mi portasti
ti vuagghjiu hare mangiare e 'mbivire.

Non vuagghjiu nommu mangiu e nommu 'mbivu
sulu nu letticiaju a la tua scala.

E 'nta lu hilu di la menzannotte
suli si liberaru li campani e suli s'accendiru li candili.

Non si 'ntisaru mai tribuli tuani
para ca sugnu l'angiali soprani o veramente l'amoroso Dio.

Jiru e s'addunaru sutta a la scala
e vittaru a Sant'Aliassiu chi spirava.

Maria si mise pemmu lu giurija
e 'nci trovau l'aniaju e lu specchjiale.

Io t'aspettava cu tanti allegrizzi
e mmo ti viju muartu 'nta ssi mundizzi;

io t'aspettava cu tantu splendore
e mmo ti viju muartu 'nta ssu scalone.

II giovane della Vergine e ch'era assai devoto
per ogni giorno una volta l'andava a visitar.

Andava cu gran pena e cu molta allegria
e facendo quella via sempre a Maria pregò.

Un giorno al suo ritorno camminando in quella strada
vide a terra un uomo ammazzato e lo stava a risvegliar.

Di luntanu hù vistu 'nsospiattu hù pigghjiatu
ca iju l'avia ammazzatu e lu hìciaru attaccar..

A la hini di l'annu lu giuvani sbenturatu
a la Rota hù chjamatu a dire la verità.

Li testimuani prisianti chi s'eranu esaminati ca prima
l'avia ammazzatu e pua l'avia rubatu chista è la verità.

Si chjusa lu processu per quello giuramento
e lu giuvani ch'era innocente si doveva fucilar.

E alza gli occhi al cielo "Regina del mio comando,
viani aiutami in questa muarti bbuanu hucìli mu hà".
E Maria col suo bel manto li palli 'nci parau.

Principi e sacerdoti restaru meravigliati
vidiandu a la Madonna chi grazia chi 'nci hà.

Dimmi o figlio mio e dimmi chi puarti addosso
ca la gran Matre di Dio ha avuto di te pietà.

Patre, mìarcuri a Dio non l'aju cammaratu
a la Vergini l'aju guardatu di la mia picciulità.

Li harzi testimuani chi ss'hannu esaminatu
'ngalera huru mandati pè la luaru falsità.

Levati Lucriazia mia, mu 'ndi 'nda jàmu
a la Madonna di la Schjavunìa.

Dunami tiampu armianu pè n'Ave Maria,
iju stu tiampu non 'nci lu vozze dare
ca subitamente la vozze ammazzare.

E duapu ammazzata l'inchjìu di rina,
'mpetrau lu cuarpu suo senza pietà.

Lu sangu pè la strata e pè la via,
'nci cumpariu la Vergini Maria:
lèvati Lucriazia mia di juacan'terra
ca non si degna di stare cu la terra.

E ddubbi ddubbi 'nci bussau a la porta:
vìani apri che Lucriazia ch'è na fata;
non è Lucriazia no ch'è fuarzi natra,
guarda jornata chi mi vinna a mia.

Dimmi Lucriazia mia cu t'ha sanatu?
M'ha sanatu la Vergini Maria
ca chija matina m'avia cumpessatu.

Nu vestitu d'uaru e quattro vacchi
'nci vuagghjiu accattare a la Madonna di la Schjavunia.

Non vuagghjiu né tue vacchi e né tuo vestitu;
prima u m'aduri a Lucriazia e duapu a mmia.

Sentiti tutti e tutti bbuani aggianti,
li mìadici di Riaci su li Santi,
sanaru li malati veramente.

'Nc'era na vota malatu lu regnanti,
era malatu ed era veramente
tutti li miadici lu licenzijaru.

E di pùe vena San Cuasimu e San Damianu:
hatindi permessu ca nui volimu entrare,
ca lu malatu volimu visitare.

Di pue rispunde lu capu di quelli mìadici
chisti ssu ragazzini e di puacu valori
ancora non hannu e la sapienzia umana.

Di pue vene la reggina sua mugliera
pè l'amuri di Dio hatili entrare;
e di pue jiru San Cuasimu e San Damianu.

Dunami na guccia e di ssa medicina
e lu regnanti hacimu sospirare.

Quandu la medicina 'nci dunaru
e lu regnanti cuminciau a passeggiare.
e lu regnanti chjamau la reggina sua mugliera.

Dammi la borsa mia cu li dinari
c'aju a pagare lu mìadicu e lu spezziale
anche il mio regno e 'nci vuagghjiu dunare.

Nui non volimu né riagnu e né dinari,
humma mandati e di l'Etiarnu Patre
duva 'nci manda e nui dovimu andare.

Cu vole grazi e mu vacia a Riaci
ca jà 'nci stannu 'nci stannu dui belli frate,
unu è dottori e natru è farmacista.