Hurri ca hurri ca passa la Zzita,
 Passa la Higghjia di lu Mulinaru!
Signora di li Truaji e Gran Puttana,
zzoppa, guercia, storta e puru nana!
Tutta di jancu ti si allicchettata,
non di sita, ma di farina arrobbata!
 Hurri ca hurri ca passa la Zzita,
 Passa la Higghjia di lu Mulinaru!
Supa a lu carru si bell’acconzata,
cu lampi e truani accumpagnata!
Tutti scazi e di haccetta armati,
puru li diavuli sugnu appostati!
 Hurri ca hurri ca passa la Zzita,
 Passa la Higghjia di lu Mulinaru!
Sup’ a ‘stu carru ‘nfocatu di guai,
si prena di siarpi e no’ sgravi mai!
‘Nci su puru li jerjiani briganti,
cu spiti, gravigghja e tridianti!
 Hurri ca hurri ca passa la Zzita,
 Passa la Higghjia di lu Mulinaru!
‘Nc’è puru nu prevati rugnusu,
cu ‘nu pisciaturi fetusu fetusu!
‘N’ortulanu, tamarru e ‘ncitrolatu,
grida e jestima cu tuttu lu hjiatu!
 Hurri ca hurri ca passa la Zzita,
 Passa la Higghjia di lu Mulinaru!
Tutti chist’animi stuarti e ignudi,
ciangianu lacrimi di fuacu crudi!
Cu l’uacchji di fora e la lingua pistata:
Viarmi! Strisciati supa a’ vava ‘nfocata!
 Hurri ca hurri ca passa la Zzita,
 Passa la Higghjia di lu Mulinaru!
‘Sti mangiati di li cane non su mai cuntianti,
vannu jestimandu a Dio ed a tutti li Santi!
Brutti e dannati gridandu preganu,
l’uacchji pe’ sempe ‘mu si chjiudanu!
 Hurri ca hurri ca passa la Zzita,
 Passa la Higghjia di lu Mulinaru!
Cu li brutti culuri di lu piditu stampati,
vue ‘mu ti guardanu tutti schiantati!
La stumaragghjia si vide assai lucianti,
di Mahammetta discipula sapianti!
 Hurri ca hurri ca passa la Zzita,
 Passa la Higghjia di lu Mulinaru!
Stringiandu la haci e cuntandu l’uri,
cu li cristiani fai ‘mbruagghji sicuri!
La trumba di lu culu sona senza grazia
‘n’aria ‘nfernale d’eterna disgrazia!
 Hurri ca hurri ca passa la Zzita,
 Passa la Higghjia di lu Mulinaru!
‘Nta lu tue cùari la vipera s’annida,
mai dasti riparu sutt’ ’a ciaramida!
Sgravasti senza sfuarzu li sette vizi,
cuntandu a tutti ca sugnu belli sfizi!
 Hurri ca hurri ca passa la Zzita,
 Passa la Higghjia di lu Mulinaru!
Di lupa e di dragu higghjia maleditta,
‘nta lu mundu hacisti sempe minditta!
Lu godimiantu tue è lu tradimiantu,
a nujiu mai serviu lu juramiantu!
 Hurri ca hurri ca passa la Zzita,
 Passa la Higghjia di lu Mulinaru!
Promentisti sempe a tutti vita ‘mbiata,
ma di sventura e disgrazia s’indotata!
Rianditi cuntu ca la minzogna,
ti jetta sempe ‘nta la fogna!
 Hurri ca hurri ca passa la Zzita,
 Passa la Higghjia di lu Mulinaru!
Puru di lu ‘mpiarnu tu si la Gran Rigina,
quant’omani futtisti cu scummisa fina?
Passati su’ li tiampi di l’innocenza,
di li verginiaji, mò, facimu senza!
 Hurri ca hurri ca passa la Zzita,
 Passa la Higghjia di lu Mulinaru!
Mo’, mi jhiuacu la parola chi mi resta!
Tu marcia ‘mpaci e senza hare hesta!
Quandu, di luntanu arrivi spedita,
è ciartu ca Tu giri pagina alla vita!
Spiaru ca Tu si prena di carità e d’amuri,
e che quandu Tu arrivi no’ puarti doluri!
Non cchjiù higghjiola bella la mia Zzita,
ma Tu, Spiritu Santu, mi sarvi la Vita!
 Hurri ca hurri ca passa la Zzita,
 Passa la Higghjia di lu Mulinaru!
 Tutta di janca sita vestuta!